|
Die twee Afrikaanse grammatikas (ASG en AAG) wat tot dusver deel
van TOP was, vorm steeds die belangrikste deel van TOP, aangesien
dit die betroubare fondasie is op grond waarvan inhoud en
hulpbronne deur VivA vir sy gebruikers ontwikkel word. Die gratis inhoud
in TOP se twee grammatikas word egter nou ook verpak in taalboeke
vir voornemende en gekwalifiseerde Afrikaansonderwysers en ouers.
Dié taalboeke, wat direk by VivA te koop sal wees, is spesifiek
daarop gerig om onderwysers in die klas én ouers by die huis te
help om die grammatika-inhoud (of
taalstrukture-en-konvensies-inhoud) wat leerders op skool onder die
knie moet kry, te fasiliteer.
VivA stel ook ’n taalonderrigadviesdiens bekend waar
onderwysstudente, Afrikaansonderwysers, -leerders of hulle ouers
navrae kan rig oor taalonderrigkwessies. Hierdie adviesdiens is
heel anders as VivA se reeds bestaande taaladviesdiens, aangesien
hierdie nuwe diens op TOP spesifiek daarop fokus om leerders te
help om die doelwitte te bereik wat Afrikaans as skoolvak stel. Het
jy al ooit byvoorbeeld gewonder of die gesegde van ’n sin net deur
werkwoorde, of deur werkwoorde én ander taaleenhede gevorm word.
Wel, moenie meer wonder oor sulke kwessies nie. Rig jou vraag aan
ervare taalkundiges deur middel van die taalonderrigadviesdiens.
Blogs wat kwessies oor taalstrukture en -konvensies (ook bekend as
grammatika) op ’n informele manier bespreek, vorm deel van dié
aanbod van TOP. Hierdie blogs is nie net handige materiaal vir die
aanbied van Afrikaanslesse nie, maar sou ook deur leerders as
aanvullende hulpbronne gebruik kon word om spesifieke
taalkunde-inhoud beter te verstaan.
Die TOP-toevoeging wat van groot waarde vir die
Afrikaansklaskamerkonteks is – en waarna ons die meeste
uitsien om aan gebruikers bekend te stel – is die praktiese
hulpmiddels wat vir leerders en onderwysers beskikbaar gestel gaan
word. Eerstens word ’n aantal gratis hulpmiddels vir
Afrikaansonderwysers (vir gebruik in die klaskamer) en vir leerders
(vir huiswerk- en eksamenondersteuning) ontwikkel. Materiaal soos
plakkate, flitskaarte, ekstra tuisoefeninge en aantekeninge vorm
deel hiervan. Tweedens word ’n aantal professionele hulpmiddels vir
Afrikaansonderwysers (vir gebruik in die klaskamer) ontwikkel. Dit
sal materiaal soos plakkaatreekse, uitdeelstukke met duidelike
nasienriglyne en animasievideo’s insluit. Hierdie professionele
hulpmiddels sal direk by VivA te koop wees.
|
No comments:
Post a Comment