Die Virtuele Instituut
vir Afrikaans het begin as ʼn enkele navorsingsprojek. Daarvandaan het
VivA gegroei na ʼn inhoudskepper vir Afrikaans, in die werksplek, in die
klaskamer, in die huis. Ons staan volledig in diens van Afrikaans en
die taalgemeenskap, en ons enigste oogmerk is die oopbreek van die taal
van ons hart vir almal wat dit wil gebruik.
|
|
|
Ons werk op
die oomblik aan die volgende:
1. ʼn Afrikaanse grammatika vir universiteite en skole
2. ʼn Reeks taalboeke vir universiteite en skole
3. Klaskamermateriaal vir Afrikaansklasse, van graad R tot graad 12
4. ʼn Stelsel waardeur ons ondersteuning kan bied vir leerders van
Afrikaans TAT
5. ʼn Reeks werkwinkels vir taalonderwysers
6. ʼn Reeks werkwinkels vir taalpraktisyns
Daarbenewens hou
ons al ons bestaande projekte aan die gang:
1. Woordeboekportaal, wat toegang bied tot meer as 55 woordeboeke en
woordelyste
2. Adviesportaal, waar enige gebruiker taalnavrae aan ons voltydse
taaladviseur kan rig
3. Korpusportaal, waar navorsers kragtige soektogte doen in ’n
groeiende versameling korpusse
4. Taalportaal, ʼn vergelykende grammatika van Afrikaans, Nederlands en
Fries, toeganklik vir internasionale navorsers
5. Ons lees-en-luisterbiblioteek, waar enige gebruiker tekste kan lees
wat terselfdertyd voorgelees word
6. Inligtingsportaal, waarin ons weekliks blogs oor Afrikaanse kwessies
publiseer
|
|
|
Ons bied ons
dienste en produkte gratis aan die taalgemeenskap, en die werk word
deur ʼn klein groepie mense verrig om ons koste so laag moontlik te hou.
Met hierdie
veldtog doen ons ʼn beroep op Afrikaans se mense om ons werk vir
Afrikaans te ondersteun.
Ons glo onwrikbaar dat elke kind wat Afrikaans wil leer praat en skryf,
die vermoë moet hê om dit te doen. Ons glo dat elke onderwyser wat
Afrikaans aanbied, toegang moet hê tot betroubare vakinhoud. Ons glo dat
elke student en dosent wat Afrikaans verder wil ondersoek, die kennis
moet hê om dit te kan doen. Geld moet nooit die rede wees waarom hulle
sukkel nie, daarom wil ons die vakinhoud wat ons skep, so ver moontlik
gratis beskikbaar stel. Maar dis ʼn droom wat tot aan die wolke reik.
|
|
|
Ons bou elke
dag daaraan, hier onder op die grond met ons hande in die sement en die
modder, maar met ons oë op die wolke. Jy kan ons droom en ons werk
ondersteun deur een baksteen op ʼn slag te finansier.
Jou R50 of
R100 lyk dalk vir jou min, maar saam met die res van die taalgemeenskap
bou jy aan ʼn wolkekrabber.
VivA is ook vir Artikel 18A-vrystelling geregistreer, wat beteken dat
enige individu of maatskappye se skenking van belasting afgetrek kan
word.
Selfs ʼn wolkekrabber bou ʼn mens een baksteen op ʼn slag. Bou saam met
ons aan Afrikaans, een baksteen op ʼn slag.
|
|
|
|
No comments:
Post a Comment