Monday, October 11, 2021

Ons boeke is eersteklas! ⭐️

 

 

 

LAPA se Jeugromankompetisie wat elke tweede jaar aangebied word, lewer van die héél beste jeugverhale wat in Afrikaans beskikbaar is. Hierdie boeke is ook gewoonlik perfek vir die klaskamer – soveel so dat ons moeite doen om studie- en leesgidse vir die meeste van die wenboeke (en ander inskrywings) te laat skryf. Die studiegidse maak natuurlik jou werk as onderwyser baie makliker! Ons kry nét kenners om ons hiermee te help en hulle ervaring in die klaskamer maak hulle die beste kandidate vir dié werk.

 

 

Ek was hier,
Nanette van Rooyen
Frankie is mal oor skaatsplank ry en kunsflieks. Sy wonder oor Milan, die geheimsinnige, stil ou in haar klas met die swart hare en bleek vel. En sy wonder oor die papier-rot en die Banksy-boek wat sy een oggend buite haar venster kry. Milan neem kitaarlesse, hou van flieks, old school-musiek soos Pink Floyd en Led Zeppelin en maak snags stensils. Hy wonder wat deesdae met hom aangaan – is hy siek of verlief? Wat dit ook al is, dit het begin die oomblik toe hy Frankie by die Waterfront gesien het ...

 

 

 

Permanente Ink,
Carina Diedericks-Hugo
Kaapstad word deur 'n reeksmoordenaar geteister. Die Romeo-en-Juliet-moordenaar se slagoffers is almal tieners. Verliefde paartjies. En almal word op dieselfde manier gevind: die lyke langs mekaar neergelê, hul hande inmekaargevleg. Die meisies het 'n steekwond aan die bors en die seuns is vergiftig. Terwyl die polisie probeer om die moordenaar vas te trek, beland 'n groepie niksvermoedende tieners in 'n gevaarlike web wat al stywer span ...

 

 

 

Betower: die drama,
Fanie Viljoen

Die drama is verwerk uit Fanie Viljoen se Betower, die 2011-naaswenner van LAPA se Jeugromankompetisie.
Die drama is nasionaal voorgeskryf vir Afrikaans EAT Graad 10 (Drama).
Dit bevat agtergrondinligting oor die skrywer, pre- en postlees-aktiwiteite en -vrae, asook volledig uitgewerkte antwoorde.

 

 

Asem,
Jan Vermeulen
’n Aangrypende grootwordverhaal oor verslawing, tweede kanse en wat dit beteken om jouself waarlik te vind. ’n Kragtoer van ’n boek wat nooit die leser met maklike antwoorde onderskat nie. Asem hoort op elke tiener se boekrak.

 

 

Afkop,
Fanie Viljoen
Trent se ouers is die naweek weg en los hom alleen by die huis. Ná ’n rowwe partytjienag saam met sy vriende wat met ’n wilde jaagtog en ’n motorongeluk eindig, word Trent met ’n moeilike besluit gekonfronteer: Wat moet hy doen met die geld wat hy op die ongelukstoneel gekry het?

 

 

Al wat ek weet,
Marita van der Vyver
’n Eg Suid-Afrikaanse tienerverhaal oor ’n sukkelende pa-en-seun-verhouding en die reddende krag van woorde. Van der Vyver skryf oortuigend oor die wêreld van performance poetry en die hoofkarakter, Gabriel, se pogings om ná sy ma se dood sin te maak van die lewe.

 

 

 

As mens geluk kon proe,
Zelda Bezuidenhout
Toe Arnelia en haar ma van Kaapstad na Potchefstroom verhuis, besluit sy dit is die ideale geleentheid om die draaiboek van haar lewe te herskryf. ’n Nuwe dorp en ’n nuwe skool is die perfekte geleentheid om haarself te herontwerp. Ongelukkig loop haar planne sommer uit die staanspoor skeef. ’n Heerlike tienerverhaal propvol humor en deernis, wat bewys dat geluk dikwels in die klein dingetjies skuil.

 

 

Ons het natuurlik vir vele van ons ander boeke ook studiegidse. Van Jaco Jacobs se boeke tot Carina Diedericks-Hugo se aksiebelaaide Thomas@-boeke. En die beste van alles? Hulle is byna almal gratis aflaaibaar!

Gaan loer gerus na ons ander studiegidse deur op die onderstaande knoppie te klik!

Het jy dalk 'n jeugboekmanuskrip in jou laai wat jy nog altyd brand om uit te gee? Wil jy deel word van LAPA se stal uitstaande skrywers? Is jy dalk die nuwe Nicola Yoon of Jan Vermeulen? Nou is jou kans. Stof daai storie af, skryf dit in en wen lekker pryse! Die sluitingsdatum is 31 Oktober 2021.

 

Posted by at

No comments:

Post a Comment

Subscribe to: Post Comments (Atom)