|
Afrikaans en sy sprekers het verlede jaar ʼn groot slag beleef toe
die uitgewer van die Handwoordeboek van die Afrikaanse Taal (HAT),
Pearson South Africa, aangekondig het dat die digitale weergawe van
die woordeboek nie verder aan gebruikers beskikbaar gestel sou word
nie. Slegs die bestaande papiereksemplare van die bron sou voortaan
vir kopers beskikbaar wees.
Verskeie rolspelers in die Afrikaanse taalgemeenskap het met
Pearson in gesprek getree om die uitgewer tot ander insigte te
bring, en VivA kan vandag bekend maak dat Pearson ingestem het om
die e-weergawe van die bron weer te laat herleef.
Dit beteken dat die eHAT voortaan weer in VivA se Woordeboekportaal
beskikbaar sal wees. Gebruikers kan toegang tot die bron verkry
deur in ons winkel op die bron in te teken en dan op ons webblad of
in ons aanlyn slimfoontoepassing, VivA-app (Aanlyn), met die
soekfunksie die inskrywings in die eHAT op te spoor.
Dit is vir skole ook moontlik om ʼn skoollisensie op die bron te
bekom. So ʼn lisensie beloop R9000 per jaar, en dit verskaf
onbeperkte toegang tot die bron vir elke lid van die
skoolgemeenskap.
VivA betuig ook hiermee ons dankbaarheid teenoor die uitgewer en al
die ander organisasies en maatskappye wat vir Afrikaans en die
Afrikaanse taalgemeenskap in die bresse getree het. Ons hoop is dat
die taalgemeenskap die werk wat gedoen is om die bron te skep en
aan die lewe te hou, sal ondersteun deur kwistig van die bron
gebruik te maak.
|
No comments:
Post a Comment