|
Die Virtuele Instituut vir Afrikaans (VivA) het pas ’n
splinternuwe, gratis slimfoontoepassing (of app) bekend gestel wat
spesifiek geskep is vir gebruikers wat sukkel om Afrikaans te
bemeester.
Die app bevat tekste wat oor die skerm rol terwyl ’n stem dit
hardop voorlees. Op dié manier word die verband tussen Afrikaans se
klankstruktuur en die geskrewe taal vir gebruikers vasgelê. Jong
lesers wat sukkel om te lees en taalaanleerders wat nie genoegsame
blootstelling aan Afrikaans kry nie, kan met hierdie app hulle
beheersing van gesproke en geskrewe Afrikaans verbeter.
Die app is in Afrikaans deur Gustaf Tempelhoff van VivA ontwikkel.
“Hierdie app is ’n mylpaal,” sê hy. “Dit het groot uitdagings
gestel, maar dit gee ook groot bevrediging om te weet ’n mens skep
iets wat vir die hele taalgemeenskap nuttig gaan wees.”
Gustaf het reeds VivA se webblad onder hande geneem sodat dit meer
toeganklik is vir blinde en siggestremde gebruikers, en die app is
ontwikkel met skermleserbeskrywings wat met toeganklikheidsagteware
versoenbaar is. Die app het ook ’n aantal eienskappe wat dit
besonder gebruikersvriendelik maak – dit slaan outomaties oor na
die donker modus indien dit in die aand gebruik word, en dit kan in
die agtergrond speel terwyl ander apps gebruik word.
Die tekste in die biblioteek is lekkerleesstories wat deur bekende
skrywers aan VivA geskenk is, en al die stories word deur
professionele stemkunstenaars voorgelees. Daar is ook ’n hele
aantal Wikipedia-tekste vir gebruikers wat meer by feitetekste
aanklank vind. In hierdie tekste is daar verklarings en vertalings
van sekere woorde en uitdrukkings, wat dit veral vir
taalaanleerders geskik maak. Die tekste is vir kinders en
volwassenes gegroepeer en in vaardigheidsvlakke gekategoriseer
sodat gebruikers die tekste kan kies waarby hulle die meeste kan
baat.
Die ATKV het ruim bygedra tot die ontwikkeling van die app. Gerrie
Lemmer, Uitvoerende Hoof: Kultuur van die ATKV, sê: “By die ATKV
besef ons watter belangrike rol boeke en letterkunde in die
ontwikkeling en vooruitgang van Afrikaans speel, want dit beïnvloed
ons denke, verbreed ons wêrelde en maak ons harte oop. Met hierdie
toepassing maak VivA vir ons taal vriende.”
VivA hoop om met hierdie app sy aanbod aan die Afrikaanse
taalgemeenskap te versterk en uit te brei. “VivA is besonder
bevoorreg om die steun van ’n organisasie soos die ATKV en van die
taalgemeenskap self te hê,” sê Marlie Coetzee, VivA se besturende
direkteur. “Ons werk met hart en siel vir Afrikaans, en ons glo dat
hierdie app die taal op ’n lekker en gemaklike manier vir al sy
sprekers meer toeganklik maak.”
VivA se Lees-en-luister-app is tans vir Android-toestelle
beskikbaar in jou gewone app-winkel, en toegang is heeltemal
gratis. Gebruikers laai die app af en registreer eenmalig. Bestaande
VivA-gebruikers kan aanteken met hulle bestaande besonderhede. Laai
die app by hierdie skakel af.
Dit is ’n lewende projek, en die inhoud word gereeld bygewerk.
Gebruikers kan dus gerus elke maand inloer om te kyk watter nuwe
tekste in die biblioteek verskyn.
|
|
|
|
Op 5 Oktober word Wêreld-onderwysersdag gevier. Dis in
1994 deur die Verenigde Nasies se Opvoedkundige, Wetenskaplike en
Kulturele Organisasie (UNESCO) ingestel.
Die Virtuele Instituut vir Afrikaans wil elke (Afrikaans)onderwyser
bedank. Ons weet julle is nie net vakkenners nie, maar ook
navorsers, vertolkers van die kurrikulum, beplanners,
assesseerders, administrateurs, lewenslange leerders, opvoeders,
inspireerders, motiveerders en boonop beraders.
Vandag vier ons jou wat volgens Antjie Krog se Onderwyser
“[t]og bly werk, al krummel jou mure op die sewende dag, al val jy
vooroor op die aarde”. Jy wat sterk bly staan “al trek [hulle] elke
dag óm jou met die ark van die jeug op [hul] skouers, met trompette
van ligsinnigheid voor [hul] monde”.
Dankie vir die reusetransformasie waarna jy daagliks streef, ten
spyte van vele uitdagings. Geniet die vakansie, veilig reis, en
sterkte vir die laaste kwartaal wat reeds aan die jaar se deur
klop.
Om Wêreld-onderwysersdag te vier, wil ons vir drie gelukkige
onderwysers die nuutste uitgawe van die Afrikaanse woordelys en spelreëls (AWS)
gee. Volg die volgende stappe as jy een wil wen:
“Ek is nie ’n onderwyser nie, maar ’n ontwaker.” –
Robert Frost
|
|
|
|
Teksredaksieportaal se
werkwinkeldatums vir 2023:
Akademiese skryfvaardighede – Maandag 30 Januarie 2023
AWS-werkwinkel – Maandag 27 Februarie 2023
Redigeringswerkwinkel – Maandag 27 Maart 2023
Vertalingswerkwinkel – Maandag 24 April 2023
Kreatieweskryfwerkwinkel – Maandag 29 Mei 2023
Akademiese skryfvaardighede – Maandag 26 Junie 2023
AWS-werkwinkel – Maandag 24 Julie 2023
Redigeringswerkwinkel – Maandag 28 Augustus 2023
Vertalingswerkwinkel – Dinsdag 26 September 2023
Akademiese skryfvaardighede – Maandag 30 Oktober 2023
Kreatieweskryfwerkwinkel – Maandag 27 November 2023
|
|
|
|
No comments:
Post a Comment