|
Penguin
Random House Suid-Afrika het pas ’n nuwe Christendruknaam genaamd
LUCA bekend gestel. Die naam is afgelei van die Latynse woord ‘lux’
wat ‘lig’ beteken en weerspieël hoe LUCA lesers sal help en lei om
hoop, inspirasie en antwoorde te kry in ’n wêreld waar dit al hoe
moeiliker word om gelowig te wees en te bly.
Veronica Scholtz, uitgewer van LUCA, sê die druknaam se aanbod sal
modern wees en leesstof aan alle ouderdomme bied, van kinders tot
volwassenes, met ’n wye verskeidenheid genres van fiksie tot
nie-fiksie. “Ons is toegewyd en opgewonde om nuwe inspirerende
stories en boeke oor die Christelike lewe en die studie, begrip en
genot van die Bybel te publiseer,” sê Scholtz.
Lesers kan uitsien na:
- Opbouende
en inspirerende boeke wat gesonde spirituele groei aanwakker.
- Vermaaklike
kinderboeke met ’n geloofgebaseerde tema deur geliefde
skrywers.
- Plaaslike
stories deur Suid-Afrikaners wat maniere gevind het om
terugslae deur hul geloof te bowe te kom.
- Boeke
wat die leser lei tot ’n dieper verstaan en toepassing van die
Bybel.
Die eerste publikasie, wat in April bekendgestel word, is die
fiksieboek vir volwassenes getiteld Arendsvlerke
vir Siebert deur die bekroonde skrywer Elsa Winckler.
Dit is ’n aangrypende en boeiende verhaal oor liefde, oorwinning,
Christelike waardes, en die impak van dwelmmisbruik op ’n gesin.
Winckler sê: “Ek is trots om die eerste skrywer te wees wie se boek
by LUCA uitgegee word! My boek gaan oor die vernietigende gevolge
van dwelmmisbruik op ’n geliefde. Ek het Arendsvlerke vir Siebert geskryf om hoop te
gee aan almal wat al moes saamleef met verslawing of emosionele
ondersteuning gebied het aan verslaafdes.”
LUCA se boeke sal vanaf April aanlyn en landwyd by boekwinkels
beskikbaar wees.
Vir meer inligting besoek www.lapa.co.za.
Volg ons op sosiale media:
Facebook - @LucaLife.LucaLewe
Instagram - @LucaLife_LucaLewe
|
No comments:
Post a Comment