Tafelberg Uitgewers Nuwe fiksie: Wit leuen deur Ruan Kemp

 

Vars en oorspronklike distopiese avontuurverhaal deur Ruan Kemp verskyn eersdaags

Wit leuen   Richter, kaalvoet in ’n japon, staar na ’n muur van vlamme. Dit is ’n golwende roesbruin wolk, met kruid op sy warm asem. Dit knetter, en dit blaf wanneer dit spoeg. Klein vuurpyltjies verskiet deur die lug en plof gloeiend in die stof. Richter staan terug. Is dit die begin van ’n ding, of is dit nou dít? Richter het 'n verlede, maar dis die hede wat hy ontglip. In die krake van dinge beweeg hy, systap hy die gesagte en die laspostenare, al die bakhand tentakels van die unitêre staat, Uiopa. Toe hy mis trap, moet hy vlug. Saam met Margaret reis hy deur 'n nagmerrielandskap 'n bisarre avontuur in. Neal werk by die Buro Regse Aksie, waar hy stories opmaak sodat die staat kan gryp, maar hy wil wegkom. Langs wilde weë probeer hy vir homself en sy seun 'n beter lewe koop. En vanuit 'n sekuriteitskompleks, tussen die woede en die wyn, skree Gehard uit teen die leuens. Niemand hoor hom nie, en self is hy doof vir sy wanklinkendheid. Is dit omdat die geskiedenis by hom spook, of is dit uit vrees vir die toekoms wat hy voorspel. Helikopters, duikbote, kindersoldate, ongediertes, mensvreters… Wit leuen wemel van onwerklikhede, afdraaipaaie, en verrassings.   "Dit is ’n waarlik verbeeldingryke skrywer. Die teks wemel van kostelike en vindingryke segswyses, kleurryke metafore, spraakwyses, en allemanswysheid van fyn allooi." - Charl-Pierre Naudé   Oor die skrywer Ruan Kemp is ’n mynbou-analis, met grade in die joernalistiek, onderwys, en ingenieurswese. Hy woon op Hermanus saam met sy vrou en drie seuns. Hy debuteer in 2019 met Gedeeltelik Bewolk. Wit leuen is sy tweede roman.     Publikasiedatum: 01 Februarie 2022 Prys: R290,00* ISBN-13: 9780624092322 Digitale-uitgawes Prys R232,00* Epub ISBN: 9780624092322 * Prys onderhewig aan verandering   ANTWOORD OP HIERDIE E-POS VIR ’N RESENSIEKOPIE, ONDERHOUD, UITTREKSEL OF MEER INLIGTING

www.nb.co.za