|
Die Virtuele Instituut vir Afrikaans wil uit hul
nate bars. Ons kondig met groot vreugde aan dat ons vroeg in Maart
’n reeks hulpbronne oor woordsoorte vir Afrikaansonderwysers,
-leerders en hul ouers beskikbaar gaan stel.
|
|
|
|
Al die eerste klomp hulpbronne wat onder die afdeling Taalonderrigportaal op VivA se webblad
gaan verskyn, is niebetaalprodukte.
Dit beteken dat hulle gratis is. Ons bied
dit gratis aan, aangesien VivA se standpunt is dat kennisverkryging
gratis behoort te wees. Hierdie niebetaalprodukte sluit in:
- ’n video getiteld Inleiding tot woordsoorte waarin
woordsoorte op ’n lewenswerklike, visuele wyse met geur en
kleur in die Afrikaansklaskamer bekendgestel kan word.
|
|
|
|
Hierdie video (net soos die ander video’s wat VivA
oor woordsoorte gaan beskikbaar stel) kombineer klank- en
skrifbeeld. Hierdeur probeer VivA om die inhoud ook toeganklik te
maak vir diegene met sig- en gehoorgestremdhede sodat hulle ook net
soos hul siende en horende eweknieë dieselfde inhoud kan bemeester.
Inklusiwiteit is vir VivA van kardinale belang.
- ’n A0-plakkaat met ’n uiteensetting van
die verskillende Afrikaanse
woordsoorte én die subkategorieë (of soorte) waarin
hulle verdeel word, elkeen toegelig met voorbeeldwoorde;
- ’n A0-plakkaat met die definisie van elke woordsoort – ook
geïllustreer met voorbeelde;
- Daar is ook 11 uitdeelstukke wat die kerninligting
van elkeen van die woordsoorte opsom – iets wat uitgedruk en
in leerders se boeke geplak sou kon word.
Hierdie uitdeelstukke is van so ’n hoë gehalte op
die web gepubliseer dat dit uitgedruk en as “plakkate” in
klaskamers gebruik sou kon word. Binnekort laai ons nóg gratis
hulpbronne op. Sorg daarom dat jy gereeld ’n draai gaan maak op
Taalonderrigportaal.
Binnekort laai ons nóg gratis hulpbronne op. Sorg daarom dat jy
gereeld ’n draai gaan maak op Taalonderrigportaal.
|
|
|
|
VivA is ook tans besig om video’s saam te stel met aanbiedings oor elke woordsoort. Dit gaan
later vanjaar op Taalonderrigportaal beskikbaar wees. Omdat hierdie
aanbiedings daarop gerig is om die onderwyser se lading ten opsigte
van voorbereidingstyd te verminder, sal dit betaalprodukte wees.
Onderwysers sal dus hierdie video's as deel van hul klasaanbiedings
kan gebruik.
|
|
|
|
Hierdie praktiese hulpmiddels word beskikbaar gestel op VivA se
webblad onder Taalonderrigportaal (ook bekend as TOP). Om toegang
te kry moet jy eers (gratis!) registreer.
|
|
|
|
’n Skakel na die hulpmiddels gaan ook op VivA se kraakvars Facebookblad, naamlik Taalonderwysersforum geplaas word. Ja, jy
het reg gehoor – ’n Facebookblad spesifiek geskep vir dosente van
Onderwysafrikaans, voornemende Afrikaansonderwysers en praktiserende
Afrikaansonderwysers (insluitend tuisonderwysers). Dit is ’n
platform waar ons wenke oor elke woordsoort (en later ook oor
klankleer, sinsbou, woordbou en betekenisleer) gaan gee, omstrede
kwessies ten opsigte van grammatika (taalstrukture en -konvensies)
gaan bespreek, meningsopnames gaan hou en skakels gaan plaas na
splinternuwe hulpmiddels (soos plakkate, video’s, werkkaarte, ens.)
en blogs wat op Taalonderrigportaal beskikbaar gestel word.
|
|
|
|
Waarom het VivA hierdie aanbod?
Die inhoud wat in ons onderrighulpmiddels vervat word, verskil van
bestaande woordsoortinligting in skoolhandboeke, aangesien dit deur
’n hele pyplyn van ontwikkeling gegaan het. Eers het taalkundiges
en navorsers van internasionale statuur in Engels geskryf oor die
patrone van Afrikaans en hulle bevindinge vergelyk met nabyverwante
tale, naamlik Fries en Nederlands. Hierna word dié inligting
gebruik om ’n Algemene Afrikaanse Grammatika (ook bekend as AAG) te
skryf wat spesifiek op universiteitstudente en -dosente afgestem
is. Dié Algemene Afrikaanse Grammatika word deurlopend op VivA se
Taalonderrigportaal bygewerk. AAG word dan weer aangepas vir
gebruik deur Afrikaans Huistaal-onderwysers in die VOO-fase.
Hierdie Afrikaanse skoolgrammatika – VivA se ASG – word as
vertrekpunt gebruik om plakkate, video’s en uitdeelstukke in ’n
maklik verstaanbare vorm vir voornemende Afrikaansonderwysers,
praktiserende Afrikaansonderwysers, -leerders en hul ouers aan te
bied. Die inligting wat deur middel van ons hulpmiddels weergegee
word, is dus geverifieer, betroubaar en belyn met internasionale
navorsing. Die inhoud oor die Afrikaansgrammatika (taalstrukture en
-konvensies) wat kinders op skool leer, moet immers ooreenstem met
dít wat internasionale taalkundiges oor die Afrikaansgrammatika sê.
Op hierdie wyse berei ons ook studente voor wat ’n loopbaan in
taalkunde wil volg en graag Afrikaans as ’n universiteitsmodule wil
kies.
Onderwysers, leerders en selfs ouers van leerders wat nie gereeld
tot internet toegang het nie, kan die hulpmiddels eenmalig gratis
aflaai en uitdruk. Die ideaal is dat die inligting deur soveel
moontlik lede van die Afrikaansonderwysgemeenskap bekom en tydens
onderrig en leer gebruik word, sodat die konsekwente onderrig van
grammatika (taalstrukture en -konvensies) verseker word.
|
|
|
|
Aanvullend tot VivA se algemene, reeds gevestigde adviesdiens wat
gebruik kan word om navraag te doen oor algemene taalgebruik, bied
ons vanaf Maart ’n kanaal waar dosente van Onderwysafrikaans,
voornemende Afrikaansonderwysers, praktiserende
Afrikaansonderwysers, -leerders en hul ouers navrae oor woordsoorte
(maar ook ander fasette van taalstrukture en -konvensies) aan
ervare taalkundiges kan rig. Hierdie nuwe diens fokus daarop om
leerders te help om die doelwitte te bereik wat Afrikaans as
skoolvak stel en om knellende probleme wat uit universiteitswerk
voortspruit, op te los.
As jy byvoorbeeld wonder of “lag” in “Ek hou van lag” ’n werkwoord
of naamwoord is, stuur jou navraag aan die Taalonderrigadviesdiens,
beskikbaar op Taalonderrigportaal.
|
|
|
|
No comments:
Post a Comment